蔡奇蘭台語文學基金會 正式成立 奇蘭園揭牌 延續台語文學精神 啟動文化 傳承新頁
【欣悦媒體/記者林舒婷/臺南報導】
為著欲延續台語詩人蔡奇蘭長年對台語文學、本土文化佮社會公益的奉獻精神，「財團法人臺南市蔡奇蘭台語文學基金會」（4）日在臺南奇蘭園舉行成立揭牌典禮，同時舉辦《蔡奇蘭八十回憶錄》出版紀念活動。文化、文學、教育界人士佮蔡奇蘭多年來的親朋好友攏到齊，共同見證台語文學傳承的新起點。
蔡奇蘭筆名「鹿耳門漁夫」，一世人熱愛台語文學，長年創作台語詩，特別是七字仔作品，深受肯定。自50歲起到人生最後階段，30多年來參與、支持超過百場文化藝術活動，毋但用文字創作保存台語的美，嘛用實際行動投入本土文化推廣，佮真濟文學、藝術及文化工作者建立深厚的情誼。
蔡奇蘭佇2026年4月1日過身了後，家屬決定延續伊的文化志業，由蔡夫人盧綉鶯女士擔任捐助人，成立「財團法人臺南市蔡奇蘭台語文學基金會」，由蔡基隆擔任董事長、蔡依儒擔任執行長，並邀請台語文學、文化佮教育界人士共同組成董事會，予蔡奇蘭一世人珍視的台語文學精神會當繼續傳落去。
這擺的揭牌典禮邀請臺南市副市長葉澤山、文學家張良澤教授、國立臺灣文學館前館長鄭邦鎮、現任館長陳瑩芳、立法委員林宜瑾，以及真濟台語文學前輩、學者佮文化界人士出席，共同見證基金會正式成立。
基金會表示，成立基金會毋單是欲紀念蔡奇蘭，更希望延續伊對台語文學、文化教育佮社會關懷的重視。
未來將推動台語文學典藏、出版、研究佮教育推廣，並規劃講座、展覽、工作坊以及文化交流等活動，同時投入社會公益佮弱勢關懷，以「傳承文化、推廣教育、關懷公益」做主要宗旨。
位佇臺南的「奇蘭園」，未來嘛會分階段規劃台語文學展覽館、蔡奇蘭紀念館、台語文學圖書館，以及多功能講座佮工作坊空間，一步一步打造兼具典藏、研究、閱讀、教育佮文化交流功能的台語文學基地。
活動當日嘛同步舉行《蔡奇蘭八十回憶錄》出版紀念，透過文字、相片佮相關資料，整理蔡奇蘭的人生歷程、文學創作佮文化活動軌跡，留落珍貴的生命佮文學紀錄。
揭牌儀式，現場以傳統辦桌款待來賓，延續蔡奇蘭重視人情味的精神。活動安排謝曉艾演唱蔡奇蘭老師作詞的作品《安平頌》、《少女春夢》，另外由董峯政老師率領「許縣溪台語文化園區」學員以及「雅風台語社」合唱團演出
「臺南市雅風台語學會」長年致力於推廣台語文化，以純正台語吟唱、演繹古典詩詞，透過聲韻佮文學的結合，傳承台語之美，嘛予更多人認識本土語言文化。這擺透過台語歌謠佮吟唱演出，予現場充滿濃濃的台語文學氣氛，嘛用歌聲向蔡奇蘭長年投入台語文學佮文化推廣的身影致敬。
基金會執行長蔡依儒表示，揭牌只是開始，未來會持續整理、保存佮推廣蔡奇蘭留落來的台語文學資產，嘛希望透過閱讀、展覽、教育佮文化活動，予無仝世代攏有機會接觸台語文學，予台語毋單是生活語言，閣會當成做承載土地記憶、文化情感佮世代故事的重要載體。
蔡 園文脈留芳影
奇 情一世寫鄉音
蘭 香伴筆傳台語
台 江月色照詩心
語 聲袂斷薪傳遠
文 墨長存記憶深
學 海相連承舊志
基 石奠定文化根
金 聲玉韻傳鄉土
會 聚眾心續新章
「財團法人臺南市蔡奇蘭台語文學基金會」的成立，象徵蔡奇蘭一世人所珍視的台語文學精神，對個人的創作佮投入，逐步行向更加長遠的文化傳承。
未來，奇蘭園將以文學做核心，串聯閱讀、研究、教育、藝術佮公益，予一份對台語佮土地的深情，繼續佇臺南開枝散葉。
蔡奇蘭台語文學基金會的成立，毋只是為著紀念一位台語文學前輩，更是將伊一世人對台語、對土地的熱情，化做文化傳承的力量。
從文學創作、台語保存，到教育推廣佮公益關懷，蔡奇蘭留落來的精神，透過奇蘭園繼續傳落去。
期待未來基金會會當保存珍貴的文學資產，予無仝世代攏有機會親近台語、認識土地，予台語文學佇臺南繼續生根、發芽，開出更加美麗的文化花朵。
留言
張貼留言