臺南44間公共圖書館攏有台語文專區 予母語對冊架行入家庭佮日常生活

結合親子講古、藝術、科技佮地方文化　予台語代代相傳、佇生活中自然使用

【欣悦媒體/臺南報導】

語言是文化的根，也是世代傳承感情的重要橋梁。為著推廣台語閱讀佮本土語言教育，臺南市政府持續透過公共圖書館推動台語文專區（15）佇鹽埕圖書館舉辦「台語文專區」開箱活動，宣布全市44間公共圖書館攏已經設置台語文專區，結合冊籍閱讀、親子講古、藝術創作、戲劇演出佮地方文化體驗，予台語對冊架行入家庭，成做生活中自然使用的語言。

活動由臺南市政府副秘書長徐健麟代表市長黃偉哲出席，文化局副局長林韋旭、多位議員佮關心台語文教育的教師鬥陣參與。現場邀請114年台語親子講古比賽冠軍家庭擔任開場演出，透過活潑生趣的台語故事，展現親子做伙學習母語的成果。附近日新國小佮永華國小附幼的師生也來圖書館參訪，透過聽故事、讀台語繪本，予囡仔對細漢就開始接觸母語，培養講台語的興趣。

副秘書長徐健麟表示，語言傳承毋但愛保存，更重要的是佇日常生活中繼續使用。市府會持續以公共圖書館做為推廣台語閱讀佮本土語言教育的重要所在，結合館藏資源、親子共學、社區參與佮跨領域合作，予民眾透過閱讀、聆聽、交流佮實際使用，慢慢建立講母語的習慣，予台語對閱讀行入生活，對家庭傳予下一代。

文化局副局長林韋旭指出，設置台語文專區毋是干焦增加台語冊的展示空間，更重要的是透過館藏帶動閱讀，進一步延伸到各種活動佮生活應用。全市44間公共圖書館共同推動，結合親子共讀、講古、藝術、科技佮地方文化體驗，予台語毋是干焦課堂內底的學習內容，閣會當成做逐工生活中親近、理解佮自然使用的語言。

臺南各區圖書館也結合地方特色，發展多元的台語推廣活動。學甲圖書館將傳統藝術融入台語手作，予民眾佇創作的過程中學習母語；西港圖書館透過刈香、金獅佮牛犁歌，介紹在地民俗文化；白河圖書館結合蓮鄉產業推動台語講古，予語言學習佮地方生活緊緊相連。

另外，「創客嘛會講台語」將台語融入科技佮Maker課程，予母語學習跨越傳統形式。圖書館志工也參與台語原創戲《圖書館的小秘密》的創作佮演出，透過戲劇表達，予台語對聽故事、讀冊進一步行入舞台，展現母語佮文化創作結合的多元可能性。

自111年開始舉辦的台語親子講古比賽，已經成做鼓勵家庭學習母語的重要平台。大人佮囡仔鬥陣讀繪本、練習台語發音、編排故事閣上台分享，毋但會當增加親子互動，也予囡仔佇開喙講台語的過程中建立信心，進一步將母語帶入家庭生活。

今年臺南市立圖書館也將佇12月5日舉辦台語親子講古比賽，邀請公視台語台《無事坐巴士》製作人張琡婷擔任主持人，期待吸引閣較濟家庭參與。相關活動資訊佮報名方式，將陸續公布佇臺南市立圖書館官方網站，歡迎有興趣的親子家庭繼續關注。

臺南市立圖書館表示，臺南推動台語已經超過十年，從台語文學、囡仔歌、講古佮說故事活動，逐步拓展到志工培訓、台語導覽、社區文化班佮親子閱讀。目前全市44間公共圖書館攏設有台語文專區，一年辦理超過100場母語講古活動，持續結合藝術、科技、音樂、戲劇佮地方文化，增加各年齡層佇生活中使用台語的機會。

一本台語繪本，會當成做親子共讀的開始；一段台語故事，也會當牽起世代之間的感情。透過全市44間公共圖書館的共同努力，臺南持續予母語對冊架行入家庭、對圖書館行入社區，予台語佇日常對話中繼續傳承。

台語毋但愛讀會曉，閣愛講會出喙、用佇生活。 予咱做伙用母語記錄土地的故事、傳承在地的文化，予台語一代閣一代傳落去。